બેરોજગારી દર 45 વર્ષના સૌથી ઉંચા સ્તરે, GDP પાંચ વર્ષના સૌથી નીચલા સ્તરે

નવી દિલ્હી, તા. 31 મે 2019, શુક્રવાર

મોદી સરકારના શપથના 24 કલાક બાદ જ શ્રમ મંત્રાલયે શુક્રવારે બેરોજગારીના આંકડા જાહેર કર્યાં છે. જેમાં 2017-18માં બેરોજગારી દર 6.1% રહ્યો, જે છેલ્લા 45 વર્ષમાં સૌથી વધુ છે. જો કે, સરકારનું તે કહેવું છે કે આ આંકડાના સંબંધમાં મેથડમાં ફેરફારના કારણે તેની તુલના પાછલા આંકડ સાથે કરી શકાય નહી.

આંકડાઓ પ્રમાણે મહિલાઓની સરખામણીએ પુરુષોમાં બેરોજગારી વધારે છે. બંન્નેની અલગ-અલગ બેરોજગારી દરની વાત કરવામાં આવે તો દેશના સ્તર પર પુરુષોમાં બેરોજગારી દર 6.2%, જ્યારે મહિલાઓમાં બેરોજગારી દર 5.7% છે. લોકો રોજગારીની શોધમાં ગામડાંમાંથી શહેરમાં સ્થળાંતર કરી રહ્યાં છે પરંતુ આંકડાઓ પ્રમાણે શહેરોમાં ગામડા કરતા બેરોજગારી દર વધારે છે. શહેરોમાં બેરોજગારી દર 7.8% છે જ્યારે ગામડામાં આ આંકડો 5.3% છે.

GDP 5 વર્ષના સૌથી નિચલા સ્તરે

સેન્ટ્રલ સ્ટેટિસ્ટિકલ ઑફિસ દ્વારા રોજગારી અને GDP સાથે જોડાયેલા આંકડા જાહેર કર્યાં છે. દેશની GDP દરમાં ચોથા ક્વાટરમાં ઘટાડો થયો છે. જાન્યુઆરી-માર્ચમાં GDP દર ઘટીને 5.8% પહોંચ્યો છે. છેલ્લા 9 મહીનામાં દેશમાં ખેતી, ઉદ્યોગ અને મેન્યૂફેક્ચરિંગ જેવા મહત્વના સેક્ટરમાં મંદીના કારણે GDPમાં ઘટાડો નોંધાયો છે. આ સાથે જ નાણાંકિય વર્ષ 2018-19માં વિકાસદર ઘટીને 6.8% થયો છે. જે છેલ્લા પાંચ વર્ષમાં સૌથી ઓછો છે. જો કે માર્ચ ક્વાટરમાં GDP દર અને નાણાંકિય વર્ષ 2019માં વિકાસ દર 7.1% રહેવાનું અનુમાન વ્યક્ત કરવામાં આવ્યું હતું.